Vedtak om skrivemåte kan påklagast av dei som har rett til å ta opp saker om skrivemåten. Det er også høve til å klage på vedtak gjort av kommunar og fylkeskommunar. Kulturdepartementet har oppretta ei eiga klagenemnd som tek avgjerd i klagesaker etter lov om stadnamn.

Liste over vedtak etter april 2007 i Hordaland og Sogn og Fjordane:

03.juli 2007 - Slettevegen i Radøy kommune
Klagenemnda gjorde om Radøy kommune sitt vedtak om at adressenamnet skal skrivast Slettavegen. Saka dreiar seg om samansetjingsmåten i eit nylaga namn. Det nedervde namnet Sletta står som førsteledd i andre namn i lokalmiljøet der den tradisjonelle samansetjingsmåten er Slette-. Det er lagt vekt på hovudregelen som tilseier at skrivemåten vil bli Slettevegen.

03.juli 2007 - Helleneset i Radøy kommune
Klagenemnda gjorde om Radøy kommune sitt vedtak om at adressenamnet skal skrivast Hellaneset. Saka dreiar seg om samansetjingsmåten i eit nylaga namn. Det nedervde namnet Hella står som førsteledd i andre namn i lokalmiljøet der den tradisjonelle samansetjingsmåten er Helle-. Det er lagt vekt på hovudregelen som tilseier at skrivemåten vil bli Helleneset.

07.mars 2008 – Nordrenut i Ulvik kommune – krav om gjenopptaking Klagenemnda held fast ved Statens kartverk sitt vedtak om avslag på krav om gjenopptaking. Nemnda peikar på at regelen om gjenopptaking ikkje er meint som heimel for ny klagetilgang. Fleirtalet i nemnda meiner at det ikkje ligg føre nye opplysningar, at vurderingane av argumenta var tilstrekkeleg drøfta under førstegongsbehandlinga, og at lova ikkje gir opning for gjenopptaking.

13. desember 2007 – Toskheim i Lindås kommune Klagenemnda gjorde om Statens kartverk sitt vedtak om at namnet skal skrivast Toskjeim. Nemnda har lagt vekt på det historiske opphavet til namnet, gjeldande rettskrivingsprinsipp, den endelege tilrådinga frå namnekonsulentane og at denne skrivemåten er i samsvar med ønsket til ein av eigarane.

03. mai 2007 - Ievegen i Meland kommune
Klagenemnda gjorde om Meland kommune sitt vedtak om at namnet skal skrivast Iovegen. Det er lagt vekt på at skrivemåten Ievegen er i samsvar med den nedervde lokale uttalen og at denne samansetjingsmåten er i samsvar med målføret.